ဆၧမၩဘျၪထဲၩ့လၧကမၫအနဲၩ့.

လၧဆၧလဖၪနီၪအလးခဲၫ့တၭႇ ၦယုဒၫဖိၪမၩဘိၪ့လဘိၪ့တၭႇ ယ့ၫၡုၬလ့ၩထၪ့လၧယရုစလံၫ့လီၫ.- ကမၫအီၪလၧယရုစလံၫ့အဖၧၩ့ႇ လၧၥိၪတရၫ့အနဲၩ့ထံၭတၭႇ ကိၭဝ့ၫအမံၩ့လၧၦဟံဘြႃၫအလူ ဘၥ့ၭစဒၫနီၪ အီၪလၧအခိၪၥိၭထၪ့အၥၭယဲဖျိၪ့ထီးနီၪလီၫ.-
ၦခမျၧးဖၭဒိၪဘၪဆၧစူၭဆၧဆၫ ၦမ့ၬဘျီၪႇ ၦခၪ့ဂၭဂီၩ့ႇ ၦအဎဲၫ့အၥွံၬၥံၪအီၪဝ့ၫလၧအဖၧၩ့ ယိလါလၧထံၫမိဝ့ၭဖျၩ့ထၪ့ဝ့ၫဒၪလီၫ.- အဂဲးဘဲၫယီၩ ထီးအဘၪအမုအလၩနီၪႇ အၥီၫ့လဂၩဂဲၫလၩ့လၧကမၫဖၧၩ့တၭႇ မၩဝၭဖျၩ့ထံၫလီၫ. မၩအၥၭဘဲၫနီၪတၭႇ ထံၫဝၭဖျၩ့ထၪ့အလးခဲၫ့ႇ ၦလၧအလ့ၩလၩ့ဆိၫဝ့ၫလဂၩဂၩနီၪႇ ကယဲဆၧဆၫလၧအလီၩ့လမံၩ့မံၩ့ဘျၪထဲၩ့ဝ့ၫဒၪလီၫ.-
ၦလၧအဘၪဆၧဆၫၥၧၫ့ဆံၫဎိၭနံၪ့ အီၪဝ့ၫထီးနီၪလဂၩလီၫ. ယ့ၫၡုၬဒၪဘၪလၧအမံၫနၩ့တၭႇ ၥ့ၪယၫဝ့ၫလၧအဆၫ ယံၬယံၬယူၭနီၪႇ စံၭအဝ့ၫႇ မိဘျၪထဲၩ့ဘၪနၥၭဆ့ဧၪ. ၦဆၫလဂၩနီၪ စံၭဆၧၫ့အဝ့ၫႇ ကဆါဧ့ႇ ထီးထံၫဝၭဖျၩ့ထၪ့ဝ့ၫတၭႇ ၦလၧအမိလ့ၩဆိၬလၩ့ယၧၩ လၧကမၫ ဖၧၩ့နီၪအီၪနးဂၩအ့ၬ. ယလ့ၩလၩ့အဘိၩ့ဘၭနီၪႇၦဂူၫဂၩလ့ၩလၩ့ဝ့ၫ လၧယၫလခီၫလီၫ.-
ယ့ၫၡုၬစံၭအဝ့ၫဒၪႇ ဂဲထုၪ့မၩန့ထၪ့နလးမံၫတၭႇ စဲၪ့ထၪ့ဘီၪ.- ၦလဂၩနီၪ အဆၧဆၫဘျၪထဲၩ့ဝ့ၫချဲၫ့မၬတၭႇ ဂဲထုၪ့မၩန့ထၪ့အလးမံၫတၭ စဲၪ့ထၪ့ဝ့ၫလီၫ.
မုနံၩနီၪမွဲမးၥံၫအနံၩလီၫ. မၩအၥၭဘဲၫနီၪတၭႇ ၦယုဒၫဖိၪလဖၪစံၭ ၦလၧ အဆၧဆၫဘျၪထဲၩ့ဝ့ၫလဂၩနီၪႇ မွဲမးၥံၫအနံၩတၭ နဆိၬနလးမံၫနီၪကြၨၭအ့ၬ. အဝ့ၫဒၪစံၭဝ့ၫႇ ၦလၧအမၩဘျၪထဲၩ့ယၧၩလဂၩနီၪႇ အအဝ့ၫဒၪစံၭယၧၩႇ မၩန့ထၪ့နလးမံၫတၭစဲၪ့ထၪ့ဘီၪ.- အ ဝ့ၫၥံၪအၪ့စၪ့အဝ့ၫ ၦလၧအစံၭနၧၩႇ မၩန့ထၪ့နလးမံၫတၭစဲၪ့ထၪ့နီၪႇ မွဲပလၫလဂၩလဲၪ.- တၭမွဲပလၫလဂၩလဲၪနီၪႇ ၦလၧအဆၧဆၫဘျၪထဲၩ့ဝ့ၫလဂၩနီၪ လၥ့ၪယၫဘၪဝ့ၫး အဂဲးဘဲၫယီၩ ၦခမျၧးအီၪထီးနီၪတၭႇ ယ့ၫၡုၬစဲၪ့ထၪ့ခွံၬဝ့ၫလီၫ.
လၧဆၧလဖၪနီၪအလးခဲၫ့တၭႇ ယ့ၫၡုၬဒၪဘၪအဝ့ၫ လၧဆၧလုအဂံၪ့ဖၧၩ့တၭႇ စံၭအဝ့ၫႇ ယိခွါ နအီၪဆီၪ့အီၪချဲၫ့ဂ့ၩမၬတၭႇ ဘဲၫၥိၭဆၧနၭနဲၪ့နီၪ ထီးဘၪနၧၩလဂ့ၩတၭႇ ထီးမၩလၧၩ့ဆၧဒဲၩဘၭလဂ့ၩ.- ၦလဂၩ နီၪလ့ၩလီၩဘၪ ၦယုဒၫဖိၪ လၧၦမၩအီၪဆီၪ့ထၪ့ထဲၩ့ယၧၩလဂၩနီၪ မွဲယ့ၫၡုၬလီၫ.- မၩအၥၭဘဲၫနီၪတၭႇ ၦယုဒၫဖိၪမၩအၧၩ့မၩနၭယ့ၫၡုၬလီၫ. အဂဲးဘဲၫယီၩ မွဲအမၩဆၧနီၪလဖၪ လၧမးၥံၫအနံၩ အကၠီၩ့နီၪလီၫ.