ဆၧထိးအၥၭလဖၪလၧယ့ၫၡုၬအဂဲး.

ယအ့ၪထိးယၥၭလၧ ယဂဲးယကၠီၪ့ဒၪယဝ့ၫတၭႇ ယဆၧထိးယၥၭနီၪတီၩအ့ၬ.- ၦဂူၫဂၩထိးအၥၭလၧ ယဂဲးယကၠီၪ့အီၪဝ့ၫလဂၩတၭႇ ယၥ့ၪယၫဆၧလၧ အဝ့ၫဒၪထိးအၥၭလၧ ယဂဲးယကၠီၪ့နီၪမွဲအတီၩလီၫ.
 နၥံၪဝ့ၫယီၩႇ နၥံၪအၪ့မၧၫ့ၦလ့ၩလၧစယီဟၫ့အအီၪတၭႇ အဝ့ၫဒၪထိးအၥၭ လၧဆၧမွဲဆၧတီၩလီၫ. မွဲလါနၫ့ဘိၩ့ ၦၡၩအဆၧထိးအၥၭနီၪႇ ယထိးဆၧၫ့ယဝ့ၫအ့ၬ. မွဲဘဲၫၥိၭနၥံၪမိထီၩ့လၧဆၧထိးထဲၩ့တၩ့ထဲၩ့နၥံၪတၭႇ ယချဲၩ့ဆၧလဖၪယီၩလီၫ.- အဝ့ၫနီၪမွဲမ့ၪဒိၩ့လၧ အခဲၩဖၩ့ထၪ့တၭႇ နၥံၪအၥၭအီၪလၧနၥံၪမိၥုၪ့ထိၬၥၭထိၬ လၧအဆၧဖၩ့အကျၩလဆိလီၫ.- ယအီၪလၧဆၧထိးအၥၭ ဂ့ၩနဲၪ့ စယီဟၫ့အဆၧထိးအၥၭဒံၭလီၫ. အဂဲးဘဲၫယီၩ ဆၧမၩလၧဖါဖ့ၪလၫ့ယၧၩႇ ဘဲၫ ၥိၭယမိမၩထီးအဂီၩ့တၭႇ ဆၧမၩလၧယမၩလဖၪယီၩ ထိးအၥၭလၧယဂဲး လၧဖါအၪ့မၧၫ့လၩ့န့ယၧၩလီၫ.- 
တၭဖါလၧအအၪ့မၧၫ့လၩ့န့ယၧၩနီၪထိးယူၭ အၥၭလၧယဂဲးယကၠီၪ့ယူၭလီၫ. အလူၥီၫနီၪ နၥံၪနါ ဂၧၫ့နးဖၧၫ့အ့ၬ. အခံးအဂၩ့နီၪ နၥံၪဒၪဘၪနးဆိၭ အ့ၬ.- အလူအထၫနီၪ အီၪဂုးခၧၫ့ဝ့ၫလၧနၥံၪjအဖၧၩ့အ့ၬ. အဂဲးဘဲၫယီၩ ၦလၧအအၪ့မၧၫ့လၩ့ဝ့ၫလဂၩနီၪ နၥံၪနဲၩအဝ့ၫဒၪအ့ၬ. ဆၧကွ့ၭအၥၭလဖၪနီၪ အၪ့ဎၬယိနၥံၪဝ့ၫဆံၭး အဂဲးဘဲၫယီၩ နၥံၪဆီၫ့မီၪ့ လၧနၥံၪမိန့ဘၪဆၧမၧၫ့လၩ့ ဆိၩလၩ့ကၠၪလၧအဖၧၩ့တၭႇ အဝ့ၫၥံၪမွဲဆၧထိးအၥၭလၧယဂဲးယကၠီၪ့လီၫ.- ဘဲၫၥိၭနၥံၪမိန့ဘၪဆၧမၧၫ့နီၪႇ နၥံၪမိဂဲၫလၧယအီၪအ့ၬ.- ၦၡၩအၪ့အူၭဆၧနီၪ ယထိးဆၧၫ့ယဝ့ၫအ့ၬ.- အ့ၪမွဲယၥ့ၪယၫနၥံၪႇ လၧယွၩအဆၧအဲၪလအီၪဘၪလၧနၥံၪအဖၧၩ့လီၫ.- 
ယဝ့ၫ ဒၪယီၩယဂဲၫလၧယဖါအမံၩ့တၭ နၥံၪထိးဆၧၫ့ယၧၩအ့ၬ. အ့ၪမွဲၦဂူၫဂၩနီၪ အ့ၪဂဲၫလၧအမံၩ့ဒၪဝ့ၫနီၪႇ နၥံၪမိထိးဆၧၫ့အဝ့ၫလီၫ.- နၥံၪထိးဆၧၫ့ဆၧအၪ့အူၭထၪ့ လိၬနၥံၪအၥၭလဂၩဒဲလဂၩတၭႇ ယွၩအဆၧအၪ့အူၭနီၪ နၥံၪလအၪ့ဎူၫအၪ့ဎၬဘၪတၭႇ နၥံၪနဲၩဆၧမိၥ့ၪ ဘဲၫၥ့ၪလဲၪ.
ထီးဆီၫ့မီၪ့လၧယမိအီၪက့ၪဆၧမၪ လၧနၥံၪအလီၩ့ လၧဖါအအီၪနီၪလဂ့ၩႇ ၦအီၪက့ၪဆၧမၪ လၧနၥံၪအလီၩ့အီၪဒံၭလဂၩဒံၭး မွဲၦလၧနၥံၪဒိၭနဲၩ့နၥံၪအၥၭ လၧအစူၪဖၧၩ့စမိစ့ၭနီၪလီၫ.- အဂဲးဘဲၫယီၩ နၥံၪအ့ၪနဲၩစမိစ့ၭနီၪႇ နၥံၪမိနဲၩယၧၩဆ့ႇ အဂဲးဘဲၫယီၩ အဝ့ၫဒၪကွ့ၭဆၧလၧယဂဲးယကၠီၪ့လီၫ.- နၥံၪအ့ၪလနဲၩ ဘၪဆၧလၧအဝ့ၫဒၪ ကွ့ၭဝ့ၫလဖၪနီၪး နၥံၪနဲၩယဆၧချဲၩ့လဖၪယီၩ မိၥ့ၪဘဲၫၥ့ၪလဲၪ.