ဆၧဂဲထုၪ့မၧၫ့ထၪ့ထဲၩ့လၧဆၧၥံၫ.

မးၥံၫအနံၩဖီၩ့ခွံၬတၭ, နးမၫရံၫမၭဂဒၫလံနံၫ, ဒဲစယ့မံၭအမိနးမၫရံၫ, ဒဲနးစလိၫမံၥံၪ, ဎွ့ၩဆၧနၧၫ့မၧၫ့ ဘဲၫၥိၭအမိလ့ၩဂုၪဘၪအဝ့ၫနီၪလီၫ.

နွ့ၫနံၩအကျၩမုခၪ့ထံၭလနံၩ ဂီၩဂီၩလ့ၬလၧမုဂဲၫထၪ့နီၪ, ၦမုၪလဖၪလ့ၩထီၩ့ လၧဆၧၥွၪခိၪအအီၪလီၫ. စံၭလိၬအၥံၪအၥၭ, မွဲပလၫမိချံးခွံၬန့ပၧၩလၧလိးအီၪလၧ ဆၧၥွၪခိၪအဖိးထိၭလဂၩလဲၪ.- အဂဲးဘဲၫယီၩ မွဲအဒိၪမၬလီၫ.

ယိထၪ့ဆၧတၭ, ဒၪဘၪလိးချံးခွံၬယူၭဝ့ၫယူၭ.- လ့ၩနုၬဝ့ၫလၧဆၧၥွၪခိၪအဖၧၩ့တၭ, အဝ့ၫၥံၪ ဒၪဘၪၦဖိၪၥၪခွၫလဂၩၥိၭဝိၬလိၫ့ဘွၩ, ဆၧၫ့နၩ့ဝ့ၫ, လၧအစူၪထွ့ၪလခီၫ့တၭ, အဝ့ၫၥံၪၥၭမဲၪၥၭဖျဲၩ့ဝ့ၫဒၪလီၫ.-

အဝ့ၫဒၪစံၭအဝ့ၫၥံၪ, ထီးၥၭမဲၪၥၭဖျဲၩ့လဂ့ၩ, နၥံၪအၪ့ဎၬၦနၭဇရ့ၭဖိၪယ့ၫၡုၬ လၧအဘၪၥံၫဝ့ၫလၧ ထုၪ့စူၪယၫအလီၩ့လီၫ. အဝ့ၫဒၪဂဲထုၪ့ထဲၩ့ယူၭ, အီၪထီးယီၩအ့ၬ. ယိခွါ, အလးထီးၦအီၪက့ၪလၩ့အဝ့ၫဒၪဘီၪ.- မွဲလါနၫ့တၭ, ထဲၩ့လီၩဘၪအထံၩအဖျဲၥံၪ, ဒဲစပံတၧၫ, လၧအဝ့ၫလဂၩ မိလ့ၩဝဲၩ လၧနၥံၪအမ့ၬယၫ လၧဂၫလလံၫအဖၧၩ့ ဘဲၫအလီၩဘၪဝဲၩနၥံၪအၥိၭနီၪ, နၥံၪမိဒၪဘၪဝ့ၫထီးနီၪလီၫ.-

အဝ့ၫၥံၪစဲၪ့ထၪ့ဝ့ၫချဲၫ့ချဲၫ့လ့ၬတၭ, ထဲၩ့စဲၪ့ခွံၬဝ့ၫလၧဆၧၥွၪခိၪနီၪဝၭထိၬဝ့ၫ, ထီၫမံၫထီၫမၪတၭ, လီၩဘၪၦနးဂၩနးမံၩ့အ့ၬ. အဂဲးဘဲၫယီၩၥၭမဲၪၥၭဖျဲၩ့ဝ့ၫဒၪလီၫ.