ဆၧဂုၪယ့ၫၡုၬလၧၥိၪနၧၫ့မၧၫ့လၧတဝၫ့ဘ့ၭၥနံၫ.

မၩအၥၭဘဲၫနီၪတၭႇ ဘိၪ့လ့ၩဖၬလချႃၭဘၪဒံၭဘၪဎူၫၥၫ့တၭႇ ယ့ၫၡုၬလ့ၩထီၩ့လၧ ဘ့ၭၥနံၫထီးအမၩဂဲထုၪ့ထဲၩ့ စလၭဇရၧၭ လၧအၥံၫယူၭဝ့ၫလဂၩနီၪ အီၪဝ့ၫအလးလီၫ.
မၩအၥၭဘဲၫနီၪတၭႇ ၦလဖၪနီၪမၩဆၧအၪ့ဆၧအီၩလၧအဂးထီးနီၪတၭႇ နးမၫၥၫမၩဆၧလုအၪ့လုအီၩတၭႇ စလၭဇရၧၭအီၪလၧ ၦဆၧၫ့နၩ့ဒံၩ့ခံၫ့လၧအၥိၭ လၧစပွဲထံၭနီၪလီၫ.- 
မၩအၥၭဘဲၫနီၪတၭႇ နးမၫရံၫ မၩန့ၥိၪနၧၫ့မၧၫ့နၫဒူၫ လၧအလူဒိၪဎွ့ၩဒိၪလလံတြၫ [ၥၧၫ့ရွ့ၫ] တၭႇ ဂုၪယ့ၫၡုၬအခၪ့တၭႇ ၥိၪနီၪအနၧၫ့မၧၫ့ဎွ့ၩထၪ့ဂံၪ့နီၪလီၫ.
မၩအၥၭဘဲၫနီၪတၭႇ ၦအီၪလၧအထံၩအဖျဲၥံၪအကျၩ လၧအမိဖ့ၪလၫ့ခွံၬအဝ့ၫ စယုဒၭအံၭစကၫရအၧၭလဂၩႇ စံၭဝ့ၫ- ၥိၪနၧၫ့မၧၫ့ယီၩ မွဲဘၪနီၫလအၪ့ဆၫဘၪဝ့ၫတၭႇ လဖ့ၪလၫ့ဘၪဝ့ၫအဎွ့ၩဒန့ရံၫၥၧၫ့ယၩလၧ ၦၡၪ့ဖိၪၦယၬဖိၪနီၪလဲၪ.- မွဲအၥၭလအီၪဘၪၦၡၪ့ဖိၪနီၪ မွဲၦအၪ့ဂူၪဆၧအကၠီၩ့တၭႇ အီၪလၧအထိၪ့နီၪ ဆိၬဆၧလၧၦဒုၭနုၬလၩ့လၧအဖၧၩ့အကၠီၩ့နီၪတၭႇ စံၭဆၧနီၪလီၫ.- 
မၩအၥၭဘဲၫနီၪတၭႇ ယ့ၫၡုၬစံၭဝ့ၫႇ ထီးမၩထံၬထၬအဝ့ၫလဂ့ၩႇ ယဘၪဆၧခုၪ့လၩ့ဘၧၩ့အနံၩ အၥၫ့အဂးနီၪႇ  မွဲအအီၪက့ၪလၩ့ဝဲၩ ဆၧယီၩလီၫ. အဂဲးဘဲၫယီၩ ၦၡၪ့ဖိၪလဖၪနီၪ အီၪလၧနၥံၪအၥိၭ လထံၪဎးလီၫ. အ့ၪမွဲယဝ့ၫဒၪယီၩ ယအီၪလၧနၥံၪအၥိၭ လထံၪဎးအ့ၬ.
မၩအၥၭဘဲၫနီတၭႇ ၦယုဒၫဖိၪခမျၧးဖၭဒိၪၥ့ၪယၫဝ့ၫလၧ ယ့ၫၡုၬအီၪဝ့ၫထီးနီၪတၭႇ ဂဲၫဝ့ၫန့ၫလၧယ့ၫၡုၬအကၠီၩ့နီၪလကၭလၧၩ့ႇ မွဲဘဲၫၥိၭအမိဒၪဘၪ စလၭဇရၧၭလၧ အဒုၭဂဲထုၪ့ထဲၩ့ဝ့ၫ လၧဆၧၥံၫအဖၧၩ့နီၪလီၫ.