ဆၧချဲၩ့ဒီၩ့လၩ့ဘၪဆဲၫ့ၦဎွံၪဆၧ.

အဝ့ၫဒၪၥီၪ့ထဲၩ့ၥၫ့ထဲၩ့ဒီၭဝ့ၫ လၧကွံၩနဲၩ့တၭႇ ၦခမျၧးဖၭဒိၪအီၪကီၪ့ လၧအအီၪ ထီးအထၪ့ဝ့ၫလၧချံၫဖၧၩ့ ဘဲၫၥိၭအမိဆၧၫ့နၩ့လၧကွံၩဖၧၩ့တၭႇ ၦခမျၧးအီၪဝ့ၫလၧ ကွံၩနဲၩ့လၧခီၫ့ထီးအလူၬလီၫ.- အဝ့ၫဒၪၥီၪ့ထဲၩ့ၥၫ့ထဲၩ့အဝ့ၫၥံၪ လၧဆၧအၪမံၩ့ လၧဆၧချဲၩ့အဒီၩ့တၭႇ လီၩဘၪဝ့ၫလၧ ဆၧၥီၪ့ဆၧၥၫ့အဖၧၩ့လီၫ.

ခိၭနၪဘီၪႇ ယိခွါႇ ၦလၧအဎွံၪဆၧလဂၩ လ့ၩဎွံၪဆၧလီၫ.- လၧအဎွံၪဆၧနီၪ လနၩ့နၩ့လၩ့ဘၪဝ့ၫ လၧဖၧၩ့ၥၭအနဲၩ့ထံၭတၭႇ ထိၪၥံၪလံၪၥံၪဂဲၫအၪ့ခွံၬဝ့ၫလီၫ.

 အဂူၫဂၩလနၩ့နၩ့ လၩ့ဘၪဝ့ၫလၧလိးကျၩ ထီးဂၪ့ခိၪအီၪလအၪဘၪႇ မွဲဂၪ့ခိၪလယိၬဘၪနီၪ မဲၪထၪ့ဝ့ၫချဲၫ့မၬလီၫ.- ထီးမုမ့ၬထၪ့ဘၪခိဎီၩဝ့ၫတၭႇ အဝံလအီၪဘၪနီၪ ဎဲၫ့ထၪ့ခွံၬဝ့ၫလီၫ.- အဂူၫဂၩလနၩ့နၩ ့လၩ့ဘၪဝ့ၫလၧဆၧဆူၪဆၧမဲၪအကျၩတၭႇ ဆၧဆူၪဆၧမဲၪ မဲၪထၪ့ဝ့ၫတၭႇ ခဲၪဘံၭခွံၬဝ့ၫနီၪ ၥၪထၪ့ဝ့ၫအ့ၬ.- အဂူၫဂၩလနၩ့နၩ့ လၩ့ဘၪဝ့ၫလၧဂၪ့ခိၪဂ့ၩတၭႇ မဲၪထၪ့ဝ့ၫနီၪႇ အၪထၪ့ဝ့ၫလနၩ့နၩ့ အၪနဲၪ့ထဲၩ့ အလးၥၧၫ့ဆံၫႇ လနၩ့နၩ့ဎူၫဆံၫ,လနၩ့နၩ့လယၩလီၫ.- အဝ့ၫဒၪစံၭဝ့ၫႇ ၦအီၪလၧအနါ လၧအနါဂၧၫ့ဆၧနီၪ မွဲအနါဂၧၫ့ဒၪဝ့ၫဆံၭ.

ဆၧမၩအၥၭ ထီးအအီၪဝ့ၫလဂၩဎးနီၪႇ ၦအီၪဝၬဖီၩ့ဝ့ၫ ဒဲၦလဆံၫနံၫဂၩ အၪ့စၪ့ဝ့ၫ လၧဆၧချဲၩ့အဒီၩ့အဂဲးလီၫ.

အဝ့ၫဒၪစံၭၦလဖၪနီၪႇ ယွၩအဘၩ့အမုးအဆၧအီၪၥူၪနီၪ ဆၧဖ့ၪၥ့ၪယၫနၥံၪလီၫ. အ့ၪမွဲၦအီၪလၧခီၫ့ လဖၪနီၪႇ ဆၧထီးအလူၬယီၩ ကဲၪထၪ့ဝ့ၫအဒီၩ့အထ့ၬ လၧအမ့ၬယၫႇ- ဘဲၫၥိၭအယိဆၧနီၪ မိယိဆၧတၭႇ ဒၪဘၪဆၧအ့ၬး နါဂၧၫ့ဆၧနီၪနါဂၧၫ့ဝ့ၫတၭႇ နၪဝ့ၫၥ့ၪအ့ၬ. ဘၪလဘၪမိကၠၪလီၩ့အၥၭတၭႇ ဆၧမိမၩဖီၩ့ခွံၬ အဆၧဒဲၩဘၭလီၫ.

ယ့ၫၡုၬချဲၩ့ဖျီၪထၪ့ ဆၧချဲၩ့ဒီၩ့လၩ့ဘၪဆဲၫ့ၦဎွံၪဆၧ.

အဝ့ၫဒၪစံၭၦလဖၪနီၪႇ ဆၧချဲၩ့အဒီၩ့ယီၩ မွဲနၥံၪနၪလၥ့ၪဘၪဧၪ. အ့ၪမွဲဘဲၫနီၪတၭႇ  မွဲနၥံၪၥ့ၪဆၧချဲၩ့အဒီၩ့ထီးအလူၬ မိၥ့ၪဘဲၫၥ့ၪလဲၪ.

ၦလၧအဎွံၪဆၧနီၪ မွဲအဎွံၪဆၧအလူအထၫလီၫ. ၦအီၪလၧဖၧၩ့ၥၭအနဲၩ့ထံၭ ထီးဆၧအလူအထၫဘၪ ဆၧဎွံၪအၥၭလဖၪနီၪႇ မွဲအယီၩႇ ထီးအနါဂၧၫ့ဆၧတၭႇ မုၪခီၩလဲးဂဲၫမၩန့ထၪ့ခွံၬ ဆၧအလူအထၫ လၧအဘၪဆၧဎွံၪအၥၭလၧအဖၧၩ့ချဲၫ့မၬလီၫ.- ဘဲၫနီၪအၥိၭႇ ၦလၧအဘၪဆၧဎွံၪအၥၭ လၧလိးကျၩလဖၪနီၪႇ မွဲအယီၩႇ ထီးအနါဂၧၫ့ဆၧအလူအထၫတၭႇ မၩန့ဝ့ၫလၧအၥုၪ့ထိၬၥၭထိၬချဲၫ့မၬတၭႇ- အဝံလအီၪဘၪ လၧအနၫ့ဆါဒၪဝ့ၫအဖၧၩ့တၭ အီၪဝ့ၫလဆိလလးလီၫ. လၧခဲၫ့ထဲၩ့ဆၧၡၪ့ဆၧနၭမွဲဂ့ၩႇ ဆၧမၩအၧၩ့မၩနၭမွဲဂ့ၩႇ ထီးအအီၪထၪ့ဝ့ၫ လၧဆၧအလူအထၫအကၠီၩ့တၭ အၥုၪ့အၥၭဂၭဂီၩ့ခွံၬဝ့ၫချဲၫ့မၬလီၫ.- ၦလၧအဘၪဆၧဎွံၪအၥၭ လၧဆၧဆူၪဆၧမဲၪအကျၩလဖၪနီၪႇ မွဲအယီၩႇ ၦလၧအနါဂၧၫ့ဆၧအလူအထၫတၭႇ- အၪ့ယိၪဆၧ ဘၪဆဲၫ့လၧအယီၩလကၠၪတၭႇ ဆၧအၪ့လံၬအၪ့လီၫဘၪဆဲၫ့ လၧအစူၪလးခၪ့ခိၪအၪနီၪႇ ၥၭကွံၩဆၧလၧအဂူၫဂၩလဖၪ ဂဲၫနုၬဝ့ၫတၭႇ ခဲၪဘံၭခွံၬဆၧအလူအထၫတၭႇ ၥၪထၪ့ဝ့ၫအ့ၬ.-

ၦလၧအဘၪဎွံၪအၥၭ လၧဂၪ့ခိၪအဂ့ၩလဖၪနီၪႇ မွဲအယီၩႇ ၦလၧအနါဂၧၫ့ဆၧအလူႇ ဒဲဒိၭန့ဝ့ၫနီၪၥၪထၪ့ဝ့ၫ လနၩ့နၩ့ၥၧၫ့ဆံၫႇ လနၩ့နၩ့ဎူၫဆံၫႇ လနၩ့နၩ့လယၩလီၫ.