ဆၧကိၪ့အၧၩ့ယ့ၫၡုၬ.

မၩအၥၭဘဲၫနီၪတၭႇ ၦယုဒၫဖိၪၥံၪ လၧအဂဲၫလၧ နးမၫရံၫအအီၪနီၪႇ ဒၪဘၪယ့ၫၡုၬမၩဆၧတၭႇ နဲၩထဲၩ့ဝ့ၫဒၪအၪဂၩလီၫ.- အ့ၪမွဲလနၩ့နၩ့နီၪႇ လ့ၩဝ့ၫလၧ ၦဖၫရစံၫၥံၪအအီၪတၭႇ လီၩဘၪအဝ့ၫၥံၪဆၧလၧယ့ၫၡုၬမၩဝ့ၫနီၪလီၫ.

မၩအၥၭဘဲၫနီၪတၭႇ ၦလုဆၧအဒိၪၥံၪ ဒဲၦဖၫရစံၫလဖၪနီၪႇ ဒုၭအီၪကိၩ့အီၪကီၪ့ ၦကိၪ့လိၬအၥၭတၭႇ စံၭဝ့ၫႇ မွဲပမိမၩပဝ့ၫဘဲၫၥ့ၪလဲၪႇ ၦလဂၩယီၩမၩလၩ့လၭဆၧအၪမံၩ့မၬကၨ.- ပအ့ၪဖ့ၪလၫ့အမၩဘဲၫနီၪတၭႇ ၦကိၭဂၩဒ့ၭမိနဲၩထဲၩ့ဝ့ၫနီၪႇ ၦရိမၫဖိၪၥံၪမိဂဲၫမၩဂၭဂီၩ့ခွံၬပလးဒဲပဆၨၩယီၩလီၫ.

ၦလၧအဝ့ၫၥံၪအကျၩ စက့အဖၭလဂၩႇ ကဲၪၦလုဆၧအခိၪလနံၪ့နီၪႇ စံၭအဝ့ၫၥံၪႇ နၥံၪဝ့ၫယီၩ နၥံၪၥ့ၪယၫဆၧနးမံၩ့အ့ၬ.- နၥံၪလဆီၫ့မီၪ့ဘၪလၧ ၦလဂၩၥံၫဝ့ၫလၧ ၦခမျၧးၥံၪအဂးနီၪႇ မွဲအဂ့ၩနဲၪ့ၦထၧၫ့ဆၨၩယၫ ဂၭဂီၩ့ခွံၬနီၪဒံၭလီၫ.- ဆၧနီၪမွဲအစံၭဒၪဝ့ၫအ့ၬ. အ့ၪမွဲလနံၪ့နီၪ မွဲၦလုဆၧအခိၪတၭႇ ချဲၩ့ဆၧလၧမီၪအချိၬနီၪ လၧယ့ၫၡုၬမိဘၪၥံၫဝ့ၫ လၧၦလဆၨၩနီၪအခိၪအကၠီၩ့လီၫ.- မွဲန့ၫၦလဆၨၩနီၪအခိၪအကၠီၩ့လကၭလၧၩ့တၭႇ မွဲဘဲၫၥိၭယွၩအဖိၪၥံၪ လၧအလၩ့မုလၩ့ဖၭလဖၪနီၪႇ မိအီၪကိၩ့အီၪကီၪ့ လၧအလးလစီၪ့ဎးလီၫ.

မၩအၥၭဘဲၫနီၪတၭႇ ခီၫလၧမုနံၩနီၪအလးခဲၫ့ အဝ့ၫၥံၪကိၪ့လိၬအၥၭ ဘဲၫၥိၭအမိမၩၥံၫအဝ့ၫလီၫ.- မၩအၥၭဘဲၫနီၪတၭႇ ယ့ၫၡုၬစဲၪ့အီၪဖျီၪလၧ ၦယုဒၫဖိၪၥံၪအကျၩအ့ၬ. စဲၪ့ထၪ့ခွံၬဝ့ၫထီးနီၪႇ လ့ၩထီၩ့လၧဒိၩ့ လၧအကိၭဝ့ၫအံဖြံၫ့ လၧခးလဘံၪ့ ဘူၭလၧမံၩ့လၬကျၩတၭႇ အီၪဝ့ၫလၧအထံၩအဖျဲၥံၪအၥိၭထီးနီၪလီၫ.

ၦယုဒၫဖိၪၥံၪ အဘိၪ့လ့ၩဖၬလၩ့ဘူၭဝ့ၫနီၪႇ ၦၡၩစဲၪ့ထၪ့ခွံၬ လၧအတဝၫ့လဖၪအၪအၪလ့ၬတၭႇ ဘဲၫၥိၭ အမိၥူၫဝၭဆံၫ့ခွံၬအၥၭ ဘိၩ့အလချႃၭမၩဒံၭဘၪ ဘိၪ့လ့ၩဖၬနီၪ လ့ၩထီၩ့လၧယရုစလံၫ့လီၫ.-မၩအၥၭဘဲၫနီၪတၭႇ အဝ့ၫၥံၪအၪ့ဎၬယ့ၫၡုၬႇ အီၪဆၧၫ့ထုၪ့လၧ ဆၧလုအဂံၪ့ဖၧၩ့နီၪ ချဲၩ့လိၬအၥၭႇ နၥံၪဆီၫ့မီၪ့ဘဲၫၥ့ၪလဲၪ. မွဲအမိဂဲၫလၧဘိၪ့ဖၧၩ့ယီၩအ့ၬဧၪ.