စယုဒၭအၥၭလၩ့ဎိၭလၧကဖ့ၪလၫ့ခွံၬယ့ၫရှူၬ.

ထီးနီၪလဖၧၫ့ ၦလၧလဆံၫနံၫဂၩအကျၩ စယုဒၭအံၭစကၫရအၧၭလဂၩနီၪႇ လ့ၩလၧၦလုဆၧအဒိၪလဖၪအအီၪတၭႇ စံၭဝ့ၫဒၪႇ- ယအ့ၪဖ့ၪလၫ့ခွံၬအဝ့ၫဒၪလၧနၥံၪအစူၪဖၧၩ့တၭႇ မွဲနၥံၪမိဖ့ၪလၫ့ယၧၩ လၧဆၧနီၪလမံၩ့လဲၪ. အဝ့ၫၥံၪခံၫ့န့စ့ၩအဘံၪ့ၥၧၫ့ဆံၫလၧအဂးလီၫ.- လၧအခၫနီၪ အဝ့ၫဒၪအၪ့ဎူၫအၪ့ဎၬဝ့ၫ အဆၧၫ့အထီအဘၪ ဘဲၫၥိၭအမိဖ့ၪလၫ့ခွံၬဝ့ၫဒၪလီၫ.
လၧဘိၪ့ကိၪလဘၪဘၪလၧမံၪ မုခၪ့ထံၭအနံၩနီၪႇ အထံၩအဖျဲၥံၪဂဲၫလၧယ့ၫရှူၬအအီၪတၭႇ စံၭဝ့ၫႇ ဘဲၫနမိအၪ့ဘၪဘိၪ့လ့ၩဖၬအၥိၭတၭႇ မွဲအဘၪနၥၭလၧပတဲၩ့ဝဲၩအလးခီၫခီၫလဲၪ.- အဝ့ၫနီၪစံၭဝ့ၫဒၪႇ လ့ၩလၧဒိၩ့ဖၧၩ့လၧ ၦလဂၩအအီၪတၭႇ စံၭအဝ့ၫဒၪႇ ဆရၫစံၭဝ့ၫႇ ယမုယလၩလၩ့ဘူၭယူၭႇ ယမိမၩဘိၪ့လ့ၩဖၬလၧ နဂံၪ့လၧယထံၩယဖျဲအၥိၭလီၫ.- အထံၩအဖျဲၥံၪမၩ ဝ့ၫဘဲၫယ့ၫရှူၬမၪလူၬဝ့ၫအၥိၭနီၪ တဲၩ့ဝဲၩဘိၪ့လ့ၩဖၬနီၪလီၫ.
မုဂၪလၩ့နီၪ အဝ့ၫဒၪဆၧၫ့နၩ့ဒံၩ့ခံၫ့ဝ့ၫ လၧစပွဲထံၭ လၧအဝ့ၫၥံၪလဆံၫနံၫဂၩအၥိၭလီၫ.- အၪ့ဆၧအဘိၩ့ဘၭတၭ စံၭဝ့ၫဒၪႇ ယလီၩဘၪနၥံၪအဆၧတီၩတီၩယီၩႇ ၦအီၪလၧနၥံၪအကျၩလဂၩ မိဖ့ၪလၫ့ခွံၬယၧၩလီၫ.- အဝ့ၫၥံၪအုၭအၥၭဒိၪဒိၪလ့ၬတၭႇ  လဂၩဒဲလဂၩစံၭဝ့ၫဆုၬဆုၬတၭႇ ကဆါဧ့ႇ မွဲယၧၩဧၪ.- အဝ့ၫနီၪ ချဲၩ့ဆၧၫ့ဆၧတၭႇ စံၭဝ့ၫဒၪႇ ၦလၧအဘၧၩ့လၩ့ဎုၬအစူၪလၧထွ့ၫဖၧၩ့လၧယၧၩလဂၩယီၩႇ မိဖ့ၪလၫ့ခွံၬယၧၩလီၫ.- ဘဲၫဆၧကွ့ၭအၥၭလၧအဂဲးအၥိၭနီၪႇ ၦၡၩအဖိၪခွၫလ့ၩဝ့ၫတၭ မွဲလါနၩ့ဘိၩ ၦလၧအဖ့ၪလၫ့ခွံၬၦၡၩအဖိၪခွၫလဂၩ ဘၪဆၧအၡၪ့လီၫ. အဝ့ၫလဂၩနီၪ အ့ၪလအီၪဖျဲၪဘၪတၭႇ မွဲအဂ့ၩဒၪအဆၧဒံၭလီၫ.
လၧအဖ့ၪလၫ့ခွံၬဝ့ၫ စယုဒၭအံၭစကၫရအၧၭ ချဲၩ့ဆၧၫ့ဆၧတၭႇ စံၭဝ့ၫဒၪႇ ရၭဘံၫဧ့ႇ မွဲယၧၩဧၪ. အဝ့ၫဒၪစံၭဝ့ၫႇ နစံၭယူၭဆၧယူၭ.