ဆၧလၧခိဆၧၩ့ချံၪ့အၪ့လဲၩ့ထၪ့အၥၭနီၪ မနီၫလဲၪ

ခိဆၧၩ့ချံၪ့ဒဲ ဆၧဆၧၩ့လံၩမုလဖုၬအဆၧၫ့အထီ ဆၧလၩ့ဆၫ့

          လၧဂီၩခီၫ နမံၫဂၬထုၪ့လၫ့အခၫ နကအၪ့ဎၬထၪ့ ကနံၩယီၩခိဆၧၩ့ချံၪ့အဆၧၫ့အထီ ကဲၪဘဲၫၥ့ၪလဲၪႉ အ့ၪမွဲ ဆၧချံၪ့စွါဘဲၫ နကၥိၭထၪ့ စွဲၪတၫပလူၬ အ့ၪမွဲဆၧခိစွါဘဲၫ နကၥိၭထၪ့ပလူၬ ဘၧၩ့ဘၧၩ့ဖိၪနီၪလီၫႉ လါနၫ့ဂ့ၩ ခိဆၧၩ့ချံၪ့နီၪ မွဲလမီၪ့ဎီၩ့ဘၪလၧ ဆၧဆၧၩ့ လံၩမုလဖုၬအဆၧၫ့အထီနီၪလီၫႉ ခိဆၧၩ့ချံၪ့နီၪ လးကျဲၩ့ကစီၪ့ ဆၧကဲၪယံၩကဲၪယါအီၪဝ့ၫ ဆၧဆၧၩ့လံၩမုလဖုၬအဆၧၫ့အထီနီၪလီၫႉ စံၭမၬချၭ - ခးပယၩ့လၬကကဲၩ့နီၪ ခိလၧၩ့စီၪ့ဝ့ၫဒၪ လၩ့ထီခိဆၧၩ့ချံၪ့အီၪဂီၩ့ႇ ခပယၩ့လံၩခံၫကကဲၩ့နီၪ ဆၧဂီးခၫအီၪဒဲ ခးပယၩ့ကျၩလးကျဲၩ့နီၪ ဎဲၪ့ထၬဝ့ၫဒၪ ခိဆၧၩ့ချံၪ့အီၪနီၪလီၫႉ

ဆၧဆၧၩ့လံၩမုလဖုၬအဆၧၫ့အထီ

          ဆၧဆၧၩ့လၩ့ႇ လံၩဂဲးဆၪ့လၩ့ႇ ဆၧအခိႇ လံၩဂဲၫႇ ဆၧစီၪ့အူၭပူၭဒဲ အဂဲးအဖးအဂူၫဂၩလဖၪမွဲဝ့ၫ ဟၫရံၫကံၩ့ ဒဲ လၫ့ဖျၬဆၧလံၩမုလဖုၬ မွဲပၫဆ့နီၪလီၫႉ ဆၧဆၧၩ့လံၩမုလဖုၬအဆၧၫ့အထီနီၪ လၧနၫရံၩအဖၧၩ့ မုနံၩမုၥၫ့အဖၧၩ့ အၪ့လဲၩထၪ့အၥၭၥ့ၪကိၭကၠၪဒ့ၭနီၪလီၫႉ စံၭမၬချၭ ဆၧဆၧၩ့ယံၬခိၬလါနၫ့ ကထုၪ့ဎး ဆၧဂဲၫခိထၪ့ထဲၩ့ၥ့ၪနီၪလီၫႉ

ခိဆၧၩ့ချံၪ့

          ဆၧလၧ ခိဆၧၩ့ချံၪ့နီၪ လးကျဲၩ့လလးအဂး ကဲၪထၪ့ယံၫယါ ဆၧဆၧၩ့လံၩမုလဖုၬအဆၧၫ့အထီလဖၪနီၪလီၫႉ ခိဆၧၩ့ချံၪ့နီၪ ဆၧအခိႇ ဆၧအစီၪ့ႇ လံၩဂဲၫဒဲ လံၩအထုၪ့ဂဲးဆၪ့လၩ့ႇ ဆၧအုၪ့ဘၪဘံၭဒဲ မုမ့ၬဆ့ၭလဖၪၥံၪယီၩ ပၫဝ့ၫထီးအလူၬလီၫႉ လၧပခးပယၩ့ဖၧၩ့ယီၩ ခိဆၧၩ့ချံၪ့အီၪဝ့ၫၥၧၫ့မံၩ့နီၪမွဲဝ့ၫ ဆၧခိခၫ ဆၧချံၪ့ခၫဒဲ ဆၧဆၧၩ့ခၫနီၪလီၫႉ