ခးပယၩ့ဒဲ ခိဆၧၩ့ချံၪ့

ပခးပယၩ့ယီၩ အီၪဝ့ၫဒၪ အလဲး စတုယၩ့ ကံၫလိၫမံၫတၫ ၆၇၇၀၀၀ ဂီၩ့ မွဲဒံၭလၧ ခးအ့ၩၡၩယီၩအဖၧၩ့ ထံၫခးလၧအဎိၩထုၬကခးနီၪလီၫႉ အီၪထၬဝဲၩ့ အဎံၫအလၩလၧၫ့ဎွ့ၩဝ့ၫဒၪ ပခးပယၩ့ယီၩ လံၩခံၫႇ မုထၪ့ ဒဲ မုနုၬနီၪ မွဲခိၪလီၩ့လဖၪ အီၪဝၩ့ဖီၩ့ထၬနီၪလီၫႉ

လၧခိၪလီၩ့လဖၪအကျၩ ဖံၬဒၩလးနီၪ ကအီၪဝ့ၫ ထံၫထၪကျိၩ့ ႇ ခၠ့ၩတွ့ၩ ဒဲ စ့ၭတီၩ့ထံၫချိၬဂူၭဒၩလဖၪဂီၩ့ ထံၫခးအၥၭၥွံၪဖျီၩ့မွဲဝ့ၫ ဆၧၥုၪ့ဆၧဖျါဆၧအနိၪ့နီၪ ဖီၪ့ထၪ့ဖံၭထၪ့ဝ့ၫအအၪထုၬဒဲ ၦခမျၧးအီၪၥၭမၧၫ့အၪမၬနီၪလီၫႉ

ခပယၩ့ ခးဆၧၫ့လဖၪနီၪ မွဲဝ့ၫ ဘင်္ဂလားဒေ့ရှ်ထံၫခးႇ တရူၭထံၫခးႇ ၥဲၫ့ထံၫခးႇ ခးအိန္ဒိယ ဒဲ ခးလၫအိၫၥံၪနီၪလီၫႉ

ခးပယၩ့ယီၩ ခိဆၧၩ့ချံၪ့အီၪဝ့ၫ (၃)  မံၩ့ မွဲဝ့ၫ ဆၧခိခၫနီၪ စၭထၪ့လၧ လၩ မၭ ဒဲ ထီးထီၩ့စိၩ လၩ မ့ၫႇ ဆၧဆၧၩ့ခၫနီၪ စၭထၪ့လၧ လၩ ဂၠိၫ့ ဒဲ လၩ အီၭတိၩဘၫႇ ဆၧချံၪ့ခၫနီၪဘိၭ ကစၭထၪ့လၧ လၩ နိၫဝ့ၫဘၫ ထီးထီၩ့စိၩ လၧ ဖ့ၫဖီၫဝၫရံၫ နီၪလီၫႉ ခးပယၩ့နီၪ ဆၧခိခၫလံၩလၩ့ခိဆၧၩ့ချံၪ့န့ဝ့ၫဂီၩ့ ခိဆၧၩ့ချံၪ့အဆၧၫ့အထီနီၪ ဂၪ့ခိၪအမ့ၬပၫ အလးကစီၪ့ဒဲ ကစီၪ့ မွဲလမီၪ့ဎီၩ့ဘၪလိၬၥၭနီၪလီၫႉ စံၭမၬချၭ- ခးပယၩ့ကျၩကကဲၩ့ခီၫ ကိၭနံၪ့ဒ့ၭ ဆၧဆၧၩ့လၩ့ဝ့ၫဒၪ ဆၧဆၧၩ့အလၧး အီၪလၧ စူၪမု ၄၀ အဖၫ့လၬ လါနၫ့ဂ့ၩ ရခဲၫ့ပၫ့လဲၫ့နဲၩ့ဒဲ တနင်္သာရီ ပၫ့လဲၫ့နဲၩ့လဖၪနီၪ ဆၧဆၧၩ့ယံၫယါ ဆၧဆၧၩ့အလၧးအီၪဝ့ၫ စူၪမု ၂၀၀ ဘျဲၪနီၪလီၫႉ

          လၩမၭ ဒဲ လၩ အ့ၫပရၧၫ့အဖၧၩ့ ခးပယၩ့ကျၩလးကျဲၩ့ ဆၧအခိအီၪဝ့ၫ ၁၁၀ ဒီဂရီဖာရင်ဟိုက် လါနၫ့ဂ့ၩ ခးပယၩ့လံၩခံၫကကဲၩ့ခီၫနီၪ ကအီၪ ၉၇ ဒီဂရီဖာရင်ဟိုက် ဂီၩ့ ၥဲၫ့ဆၧဒၩ့ခိၪနီၪ ကအီၪ ၈၅ ဒဲ ၉၅  ဒီဂရီဖာရင် ဟိုက် နီၪလီၫႉ လံၩဂဲၫအဆၧၫ့အထီနီၪ ထံၫနဲၩ့ထံၭလးကျဲၩ့လဖၪ ဆီၪ့ဝ့ၫဒၪ လံၩမုလဖုၬ ဂဲၫၥ့ၪနီၪလီၫႉ လၧ ၂၀၀၈နံၪ့ လၩ မ့ၫ ၂ၥၫ့ ဂဲၫဝ့ၫဒၪ နၫဂ့ၭ လံၩမုလဖုၬဖၭဒိၪနီၪ ခးပယၩ့ဖးဖီၩ့ဖၧၩ့ အနၭထုၬ နဲၩ့ဎီၩ့ဆၧလၩ့အၪ့ယိၫ နီၪလီၫႉ မွဲဆၧနီၪအကၠီၩ့ ခးပယၩ့ ဘဲၫခိဆၧၩ့ချံၪ့အဆၧၫ့အထီ ကဂဲၫဂ့ၩထၪ့အဂး ပကဘၪဆုးဖီၪ့ဂုးထၪ့ ၥံၪ့ကျိၭလဖၪဒဲ ခးပယၩ့ကျၩ ဆၧခိလးကျဲၩ့လဖၪနီၪလီၫႉ